E kölsch Verzällche: De Höllemaschin

De Höllemaschin Et letz jov et em Rot vun Kölle ne Diskösch, ov he bei uns en Kölle de Laubblöser verbodde wäde sollte. Su ne Blöser jeit einem ärch op de Nerve, dat es en richtije Höllemaschin.

Em November sin mer för e paar Däch noh Bayern jefahre öm fit zo sin för de Kressdachszick. Nevven uns Wonnung wor e jroß Jrundstöck met ner Villa drop. Op der Wis loche püngelwies Blädder. Ich hätt et mer jo denke künne. Dä Nohber hatt en Firma bestallt, die die Blädder fottrüme sollte. Ävver domet hatt hä sich ärch en de Finger jeschnedde. Natörlich komen die Arbeitslück met esu ner Höllemaschin, nem Laubblöser, un nit met enem Krätzer.

No soll esu en Maschin uns Minsche jo de Arbeit leichter maache. Esu däten se en aller Rauh, ävver met nem öntliche Kraach, de Blädder fottblose. Jedes Fitzje wood vör inne herjedrevve, vum Jrundstöck üvver de Stroß un op die ander Sick op ene huhe Blädderberch. Zwei Stund han se dodran jebrasselt, dann wore se fädich. En himmlische Rauh! Ich daach noch: „Wie lang? Jlich kütt bestemmp widder ne Saugwage öm de janze Blädder opzosauge.“ 

Nä, et woot Nommedach, immer noch nix! Noh un noh kom jet Wind op.

Ich satz mich an et Finster met ener Tass Kaffe, han de Zeidung jelese un jewat. Stellt üch vör, et kom wat kumme moot. Ich weiß, ich bin jo fies, ävver de Nator hät ehr eije Jesetze. Ne öntlije Winddäu dät die drüjje, akkurat zesammejeblose Blädder huh hevve un widder in alle Richtunge verdeile, wo se herkome. Zo allem Unjlöck fing et donoh och noch wie us Emmere an zo räne. 

Ich jläuv mingem Nohber stundte bei dem Anbleck de Hoor zo Berch.

Wat nötz en Maschin, wann mer verjiss der Kopp enzoschalde? En Kölle nennt mer sujet: Ülespiejelsarbeid.